Bunge la Kitaifa limetangaza kuwa kikao kilichopangwa kufanyika Alhamisi, Aprili 24, 2025, kitasitishwa ili kutoa nafasi kwa wabunge kushiriki kwenye shughuli za kumwomboleza Papa Francis, aliyefariki Aprili 21, 2025.
Taarifa kutoka kwa Spika wa Bunge Moses Wetang’ula imeeleza kuwa hatua hii inalenga kuwawezesha wabunge, hasa wa imani ya Kikatoliki, kushiriki kikamilifu katika maombolezo. Wabunge hao wanatarajiwa kuelekea kwenye makazi ya Mwakilishi wa Papa nchini Kenya, Askofu Hubertus Matheus Van Megen, kwa ajili ya kutia sahihi kitabu cha maombolezo.
SOMA PIA: Vatican yatangaza mazishi ya Papa yatafanyika Jumamosi, Aprili 26.
Katika kikao cha Bunge kilichofanyika Jumanne, wabunge waliungana kuenzi maisha ya Papa Francis. Walimtambua kama kiongozi aliyesimamia maadili ya kijamii na mshikamano wa kidini. Wengine walieleza jinsi mafundisho yake yalivyogusa maisha ya watu wa imani mbalimbali.
Aidha, mchango wa Kanisa Katoliki chini ya uongozi wa Papa Francis ulitajwa kuwa muhimu kwa maendeleo ya taifa. Bunge lilielezea jinsi taasisi za Kanisa zimechangia katika sekta ya elimu na huduma za kijamii. Shule na hospitali nyingi zilizoanzishwa na Kanisa zimekuwa msaada mkubwa kwa jamii kote nchini.
Mchango wa Papa Francis Duniani
Mbali na kuwa kiongozi wa Kanisa Katoliki, Papa Francis alikuwa mtetezi wa maskini, wakimbizi na wahitaji. Alijitokeza kupaza sauti kuhusu mabadiliko ya tabianchi na kuhimiza ulimwengu kuchukua hatua. Kupitia waraka wake maarufu wa Laudato Si, aliweka msingi wa mazungumzo ya dunia kuhusu mazingira.
Alikuwa pia mhamasishaji wa maelewano kati ya dini. Aliendeleza juhudi za mazungumzo kati ya Wakristo, Waislamu na Wayahudi, akisisitiza mshikamano na heshima ya binadamu. Ujumbe wake wa amani na huruma ulivuka mipaka ya dini na taifa.
Katika bara la Afrika, alihimiza haki na usawa, akipinga wazi rushwa na ukosefu wa uongozi bora. Akiwa Kenya mwaka 2015, alitoa wito wa mshikamano wa kitaifa na alihimiza viongozi kuwahudumia wananchi kwa uadilifu.
