Shangwe na nderemo zilitawala maeneo mbalimbali ya ulimwengu usiku wa kuamkia leo, huku watu wakisherehekea kwa furaha kuingia kwenye mwaka mpya wa 2024. Sherehe hizi za kukaribisha mwaka mpya ziliandaliwa katika pembe tofauti za ulimwengu, huku watu wakichagua njia mbalimbali za kusherehekea mwaka huu na pia kuaga mwaka wa 2023.
Nchini Kenya, waumini wa dini mbalimbali walikusanyika katika maeneo ya ibada kwa shughuli za kuaga mwaka uliopita na kusherehekea mwaka mpya kwa ibada mbalimbali za kumsifu Mungu. Sehemu nyingine, watu walivutiwa na burudani na maonyesho ya fataki, hasa mji kama vile Nairobi, na Mombasa ambapo maelfu ya wananchi walijiunga katika shamrashamra hizo.
Wanamuziki na wasanii walicheza jukumu muhimu katika kutoa burudani kwa umma usiku kucha, huku wakiwatumbuiza wananchi katika maeneo ya sherehe. Wale waliosalia nyumbani nao walipata burudani kupitia matangazo ya moja kwa moja kwenye runinga, redio, na mitandao ya kijamii.
Mjini Nakuru, Kiongozi wa Taifa, Rais William Ruto, aliongoza sherehe za kuukaribisha mwaka mpya katika hafla iliyofanyika kwenye ikulu ya Nakuru. Kabla ya sherehe hizo, Rais Ruto alitoa hotuba kwa taifa, akitoa matamshi ya matumaini na kuwatakia wananchi mema ya mwaka mpya. Katika hotuba yake, aliitetea sera na maamuzi ya serikali ya Kenya, hasa katika eneo la ukusanyaji wa ushuru.
